काठमाडौं । राष्ट्रिय दलित पत्रकार संघ, नेपाल बागमती प्रदेशको प्रथम अधिवेशन मंगलबार सम्पन्न भएको छ । काठमाडौंस्थित नेपाल पत्रकार महासंघ केन्द्रीय समितिको सभाहलमा सम्पन्न अधिवेशनले बसन्त परियारको अध्यक्षतामा १२ सदस्यीय नयाँ कार्यसमिति सर्वसम्मत रूपमा चयन गरेको हो ।
नवगठित कार्यसमितिको उपाध्यक्षमा विष्णु वि.क. र चण्डिका नेपाली चयन हुनुभएको छ । सचिवमा गोपाल विश्वकर्मा (चितवन), सहसचिवमा तिर्थ नेपाली तथा कोषाध्यक्षमा राजकुमार नेपाली चयन हुनुभएको छ ।
यसैगरी कार्यसमितिको सदस्यहरूमा कमल वि.क., सुक्रराज मग्राती, विनित तिरुवा, भरत वि.क., अतिना परियार र उपेन्द्र लुहार चयन हुनुभएको संघका केन्द्रीय अध्यक्ष विनोद पहाडीले जानकारी दिनुभयो ।
नवनिर्वाचित कार्यसमितिलाई संघका केन्द्रीय अध्यक्ष विनोद पहाडीले खादा लगाएर सम्मान प्रकट गर्नुभएको थियो ।
अधिवेशनको उद्घाटन गर्दै बागमती प्रदेशका मुख्यमन्त्री इन्द्रबहादुर बानियाँले प्रदेश सरकारले दलित समुदायको आयआर्जनसँग सम्बन्धित कार्यक्रमलाई उच्च प्राथमिकता दिएको बताउनुभयो ।
उहाँले संविधानमा व्यवस्था गरिएको दलित समुदायको हक अधिकारको रक्षा र कार्यान्वयनमा जोड दिनुभयो ।
कार्यक्रममा नेपाल कम्युनिष्ट पार्टी (एमाले) का केन्द्रीय सदस्य तथा पूर्व राज्यमन्त्री जीतु गौतम, दलित मुक्ति मोर्चाका अध्यक्ष तथा पूर्व मन्त्री दलजीत श्रीपाइली, नेपाल पत्रकार महासंघका उपाध्यक्ष उमिद प्रसाद बागचन्दलगायत वक्ताहरूले राष्ट्रिय दलित पत्रकार संघको गतिविधि तथा योगदानको प्रशंसा गर्नुभयो ।
अधिवेशन संघका संस्थापक तथा कार्यवाहक अध्यक्ष कमल कुमार विश्वकर्माको अध्यक्षतामा सम्पन्न भएको हो । कार्यक्रममा दलित आन्दोलनका अगुवा तथा देशभरका विभिन्न जिल्लाबाट आएका दलित पत्रकारहरूको उल्लेखनीय उपस्थिति रहेको थियो ।